السبت، 28 مارس 2009

عايشه في بحر الحياه

عايشه في بحر الحياه
مركب ليها شراع
بتحارب الامواج
وبتتمنى النجاه
بيأدف البحار
نفسه في طوق للنجاه
نفسه في بر أمان

عايشه في بحر الحياه
أحلام سنين كتير
أحلام عمر جميل
أحلام طفل برئ
نفسه يعيش الحياه
نفسه يشوف السلام نفسه
نفسه في أرضه يلاقي
حريه زى غيره
نفسه يلعب ويجرى
نفسه يحس بأمان

عايشه في بحر الحياه
أحلام لناس كتير
أحلام حلوه وبسيطة
احلام حب وأمل
أحلام مش تنتهى
عايشه في بحر الحياه

الأربعاء، 4 فبراير 2009

بكره أحلي .........

ممكن تقولوا عليها خاطره او مشاعر كانت جوايا قررت اعبر عنها يارب تعجبكم
لما أحلامنا البريئه تتولد من تانى فينا
لما نور الشمس يطلع
وأما صوت عصفور يغرد
لما بكره يبقي أحلى
والحياه أحلي وأحلى
والوجود أجمل بحب
لما أشوف الدنيا أحلي
وأما قلبي يبقي أبيض
وأما قلبى يبقي ورده في الربيع عايزه تفتح
لما أعشق كل صبح
لما أحب موج البحر
لما جوانا الأمل يكبر أكتر مما كان
لما أحس بالأمان
وأما أعشق صوت الأذان
وأجرى أصلي وراء الإمام
لما أشوف في عيون بريئه
أحلي معنى للبراءه
لما أحب بجد حد
وأعشقه من جوا قلبي
لما أقول كلمة بحبك وأملك الدنيا بقولها
لما أحس إنى فعلا
شخص لسه عنده قلب عنده حب
يبقي بكره أكيد أحلى
احلي وأحلي من النهارده
يااااااااااااااااااااااااارب بجد تعجبكم

الأحد، 1 فبراير 2009

أحلام لكن حقيقه

السلام عليكم ورحمة الله وبركاته

ازيكم كلكم يارب تكونوا في أحسن حال
بصوا بقي انا النهارده هعرفكم بنفسي ده بعد إذنكم
انا طالبه لسه يعنى مش كبيره اوى ممكن تقوليلى بحر زى اسم المدونه وانا من المنصوره عندي عشرين سنه
بدرس أداب قسم اعلام (إذاعه وتليفزيون )طبعا يعنى ماشاء الله عليا في الفرقه الرابعه
بس نفسي ابقي صحافيه ونفسي أحضر كمان دارسات كمان في الاخراج .
بحب أحلم اوى بحاول احقق احلامى لكن مش شرط تتحقق مش بحب اليأس بحب المحاوله
بحب أكتب خواطر أوى واعبر عن مشاعرى بورقه وقلم يعنى اكتب اللى بحسه أوى
بحب الرسم اوى وبحب الانترنت جدا وبعشق حاجه اسمها البحر
بحلم انى اكون بيت مسلم بجد قايم على الاسلام صح من غير عقد وبرده من غير تسيب
بحلم أنى في يوم ان شاء الله أكون حد بجد فعال في المجتمع بتاعه ويخدم الاسلام بجد
وإن شاء الله تكون المدونه ده اول الطريق في تحقيق حلمى
وتكون كمان طريق يقربنى من ربنا واقدر اعبر فيها عن مشاعري وعن رأيى بكل صراحه وبصدق
واقدر افيد بيها واستفيد منها
كده ممكن تقولوا أحلامى سهله وممكن بل أكيد إن شاء الله هتبقي حقيقه

دعواتكم